Дустым

Теләсә нинди серне сөйләрлек, теләсә кайсы вакытта өенә барып керерлек якын дусларым юк. Дусларым бар, һәм алар үпкәләмәсенәр: эш бары тик минем аралаша белмәвемдә. Дистанция тотып, бер кешене дә җаныма якын китерә алмыйм. Тик берничә дустым бар шулай да.

Ул да минем кебек кыргый. Өенә дә, күңеленә дә кунакларны сирәк кертә. «Матурымка», «алтынымка» дип тәмле телле сөйләшә белми. Артык дөрес дип санылар аны. Чиста-пөхтә, бөтен әйбере үз урынында, һәр сумны янга калдыру турында уйлый. Мин алай булдыра алмыйм — минем киемнәр бүлмә буенча чәчелеп беткән, сумкада бардак, акча янчыгында ничә сум калганын хәтерләмим. Дустым матур итеп рәсем ясый. Математика кебек төгәл фәннәрне бөтен класс аннан күчерә иде. Ә миннән — рус, татар телен, җәмгыять фәнен.

Ул артык коры, җитди, кырыс булып тоела. Хисләре тирәндә яшерелгән аның. 16 ел беләм мин аны, ә ул барыбер мине кайвакыт баласыманлыгы, наивлыгы белән шаккаттыра. Әйе, ул миңа көн саен «Сәлам, дустым!» дип смслар җибәрми. Ул — тыйнак кеше, кайчак артык тыйнак һәм басынкы. Ләкин кирәк чакта ул минем янымда. Ул миңа булыша. Үзенең тынычлыгы, пөхтәлеге белән мине дә тынычландыра. Юмор хисе үз урынында: рәхәтләнеп көләбез аның белән.

Башкалар күптән югалды: моның турында язуы авыр, әмма мәктәптән бирле дус булып йөргәннәрдән барысы да миннән читләште. Әллә үзем алардан читләштемме? Ни булса да, чыны шул: минем дусларым күп түгел, һәм ул аларның берсе. Аллаһы Тәгалә аңа бәхет, иман ныклыгы насыйп итсен иде, гаилә корып тигез тормышта яшәргә язсын иде.

Posted in Без рубрики | Tagged | 3 комментария
 

Көзге депрессия

Русия халкын “караңгы чырайлы”, “сирәк елмаялар” дип тәнкыйтлиләр. Чынлап та, Мәскәүме ул, Казанмы, башка шәһәрме – авыз турсайтып йөрибез. Гел шат кыяфәт белән йөреп өйрәнмәгән без.

Елына 9 ай болытлы, яңгырлы һава торышы, я кар, я яңгыр, я боз. Иртә караңгы төшә, иртән чыгып китәсең – тирә ягын кап-кара, эштән кайтасың – кап-кара. Ачуым килмәгәе, шатланырсың монда! Кешенең халәте бит кояш яктыртканнан да тора.

Көчәнеп елмаюга караганда, ихлас усал чырай якынрак миңа бүген. Сезнең фикерегез ничек?

Posted in Без рубрики | Tagged , | 3 комментария
 

Мишәр килене

Цүпрәле сөйләме башта бигрәк каты тоелган иде. Яңа туганнарымның «ч» урынына «ц» диюенә, диалект сүзләренә ияләштем тагын. Әй, кызык та аларны тыңлавы!

Түшәм — путалак (потолок), бераз — берсәк, гел — ялан, тәрәзә пәрдәсе — элеңге,һ.б. сүзләргә өйрәнеп беттем. Тагын, мишәрләр сүзләрне киредән әйләндереп әйтәләр — хатын-кыз түгел, кыз-хатын, исән-сау түгел, сау-исән. Ой, ә тагын «әйе» урынына «да» куллананлар.

Иң кызыгы, Казанга күчкән мишәр балалары гади татарлар белән әдәби телдә аралаша. Ләкин телефоннан берәр туганы шалтыратса..шундук ц-ц-ц башлана)

Posted in Без рубрики | Tagged , | 5 комментариев
 

Вакыт машинасы.

Бәләкәй Апушның авыр балачагы турында кем генә укымагандыр? Тукайның фаҗигале язмышы гел минем елак күңелемнән яшь агыза иде. Кечкенә чакта минем хәтта хыялым бар иде: вакыт машинасы булсын иде дә, мин Тукай заманына барып, аны үпкә чиреннән хәзерге дарулар белә дәвалар идем… Ул терелер иде, яшьли гүргә кереп әрәм булмас иде дип уйлый идм.

Фантастика укып/карап җүләрләнгән башка нинди генә уй килмәс! Ә шулай да, кайвакыт вакыт машинасы темасы кабат исемә төшә. Дөресрәге, вакыт машинасы да түгел, ә альтернатив чынбарлык темасы. Әгәр дә мин бу кешене очратмасам, бу җиргә бармасам, башка уку йотрына кергән булсам, тормыш ничек үзгәргән булыр иде?

Хаталарны ясамас өчен вакытны кире кайтарыр идем дә…Файдасыздыр бу. Үткәндәге хаталарыңны төзәтеп бетерсәң дә, яңа хаталар ясамассың дип кем гарантия бирә ала? Димәк, вакыт машинасы булса, бөтен тормышым хата төзәтүгә әйләнеп калачактыр. Хаталар өстендә эш, нәкъ мәктәптәгечә =) Вакыт машинасы хакында күпме генә хыялланма, «Кая барсаң да, кара сакалың артыңнан калмас» дигән мәкаль искә төшә. Күпме генә ялгышлардан качырга теләсәң дә, үз-үзеңнән кача алмассың.  Үткәндәге берәр фаҗиганы яисә һәлакәтне булдырмыйча калсаң да, вакыт шулай үзгәрер — бер бәла урынына икенче бәла килеп чыгар, бер корбан урынына икенче корбан һәлак булыр, ахрысы.

Posted in Без рубрики | Leave a comment
 

Хәерле иртә! Хәерле көн! Хәерле кич! Сәлам! =)

Соңгы вакытта блоглар, блогерлар шуның хәтле популяр булып китте, хәтта ки ТВ яңалыкларында да блог цитаталарын бирергә тайчанмыйлар. Кем соң ул блогер? Үз блогымны ачканда, дөресен әйтим. блогның нәрсә икәнен юньләп аңламаган да идем.

Блог (инглизчә blogweb log —  интернет көндәлеге сүзеннән)  — даими рәвештә яңартылып торган текст, рәсем яки мультимедияле язмалардан торган веб-сайт. Блогларга озын булмаган һәм вакыт буенча тәртипкә китерелгән язмалар хас (соңгы язма беренче булып күрсәтелә). Гадәти көндәлектән блогның аермасы шунда ки, блог гадәттә чит кешеләр өчен ачык һәм башка кешеләр авторга үз фикерләрен яза алалар. 

Ә блогер, димәк, блог алып баручы кеше)

Posted in Без рубрики | 4 комментария