Алма бөртеге язмалары

ШТК — Шаяннар һәм тапкырлар клубы, ягъни татарча КВН. Кичә, 8нче декабрьдә татарча ШТК уенын карадык. Үземнең дә берничә ел элек Шәрыкның татарча КВНында катнашканым бар иде. Һәм үз фикеремне әйтәсем килә — молодцы, егетләр-кызлар! ШТКда мәктәп укучылары катнашкач, башта күңелсез булыр дип уйлаган идем. Ләкин киресе килеп чыкты!

Инде икенче тапкыр узган татарча КВНда үткен һәм юморлы балалар катнашты. Кайбер мәзәкләрне ну пычагым да аңламадым, ләкин күпчелек чыгышлардан рәхәтләнеп көлдем. Бу балалар шул хәтле сөйкемле, ут янып торалар, бииләр дә, җырлыйлар да. Бигрәк тә командада бииик нәни, 7-8 яшьлек балалар булуы куандырды. Уиии, шундый милашкалааар :))) Саф татарча сөйләшәләр, ә бит күбесе — Казан мәктәпләреннән. Кыскасы, кичәге кич миндә оптимизм уятты. Мондый балалар булганда, Алла бирса, милләтебез яшәр 🙂

Басып торасың кайчак шулай Кольцо каршында, я Бауман урамында. Берәр иптәшеңне көтәсең, иптәш гадәттәгечә соңга кала. Андый очракларда мин вакыт узсын дип як-якка карый башлыйм. Тыз-быз ашыккан кешеләрне күзәтү үзе бер тамаша.

Кием, бизәнгеч, чәч, яулык ише әйберләрне тикшереп туйгач, кешеләрнең йөзләренә игътибар итә башлыйсың. Кемдер елмая, кемдер, кашын җыерып узып китә, кайберәүләре, йөзләренә текәлгәнемне сизеп, гаҗәпләнеп карыйлар. Кольцо каршында гадәттә сыңар чәчкә тоткан егетләр таптана — свидание, баш әйләндергеч биек үкчәле туфли кигән кызлар шопингка ашыга. Яшь ментлар арлы-бирле тәртип саклап чайкалып йөриләр. Гадәттәгечә, Кольцо ишек төбендә шырык-шырык көлеп бала-чага кыяфәтле егет-кызлар тәмәке тарта.

Шәһәр тормышы бертөрле дә, минут саен үзгәреп торучан да…

Тәрҗемә өлкәсендә эшләрем хөрти, шуңа күрә бу мәглүматны урысча вариантта китерәм:

Аль-Бухари передал:”Пророк(САС)сказал:”Пятеро являются мучениками: умершие от чумы, умершие от болезней живота, утонувшие, погребённые под обломками и павшие на пути Аллаха”

«Булгария» теплоходында баткан мөселманнар шәһид, иншәАллаһ. Урыннары җәннәттә булсын.

2 июль көнне Казанның Татнефть-Арена залында Гордон Мэтью Томас Самнер, яки, гади генә итеп әйткәндә, җырчы Стинг чыгыш ясады. Аны белмәгән кеше сирәк, исемен белмәгәннәр дә, һичшиксез, аныд моңлы җырларын ишетеп беләләр. Бөтендөнья масштабындагы йолдызны сәхнәдә күрү 10 мең чамасы кешгә тәтеде.

Татнефть-арена парковкасы моның хәтел затлы джипларны гомердә дә күргәне булмагандыр: кайсы гына регион номерлары юк, нинди генә марка һәм модельләр юк. Стингны тыңларга Уфа, Түбән Новгород, Самара, башка җирләрдән дә күп кеше килде.

Үз фикеремне әйтим — безнең эстрадада Стинг кебек профессионаллар юк ул. Безгә ялтыравык чәчәкле-чуклы киемнәр булсын, пиар булсын, скандал булсын, сәхшәдән эчпошыргыч төче сөйләнүләр булсын… Ә Стинг гап-гади кара чалбар, кара күлмәк, соры футболкадан, бөтен Татнефть-аренаны яңгыратып чыгыш ясады.

Барыбызга да балачактан ук таныш Shape of My Heart җыры, клон сериалыннан таныш Desert Rose, пацифистик рухтагы Russians, лирик Roxanne….Концертны соңгы 15 минутында бөтен зал аягурә басып алкышлады Стингны.

Яллар супер булды бит, әй! 17 июнь, шимбә көнне Болгар җыенына бару насыйп булды. Болгарда элек булганым бар иде – мәктәптә Соңгы кыңгырауны бәйрәм иткәндә, сыйныфыбыз белән шунда барган идек. Ул заманнан инде шактый вакыт узып китте.
Бу юлы исә Гамил Нур, супер-пупер-мега тамада оештырган автобуста сәяхәт кылдым. Көнем аеруча иртә башланды: 5 тә торып, сәгать иртәнге 7дә Җиңү проспектында автобус көтә идем инде. Бераз соңарып килде шул ул, өстәвенә, Болгарга җитәрәк зу-у-ур бөке дә бар иде. Искиткеч хәл: авылга керер юлда бөке! Элек җыенда булмаганга күрә, минем өчен монда шундый күп халык килүе яңалык иде. Хәтта автобусны авыл башында калдырып җәяү тәпиләргә туры килде.
Халык – диңгез хәтле. Бөтен Сабантуйлары һәм башка бәйрәмнәр белән чагыштырырлык та түгел. Бер апа әйтмешли, “бөтен дөнья хәзрәте җыелган”. Хәзрәтләр генә түгел, гади халык та, сатучылар да күп. Бер таныш кызым “мөселман Сабантуе бит бу, әлхәмдулилләһ” диде. Әйе, чынлап та, монда кеше гыйбәт тә алды, борынгы җирләрне зыярәт итте, вәгазь тыңлдады. Шулай ук, монда кешеләр аралашалар, берләшәләр, сату-алу эшләре дә җайга салынган.
Таш пулатлар, ханнар төрбәсен мыж халык сырып алган иде. Алар турында язып тормыйм – аларны һәркем белә, Америка ачмамдыр. Болгардагы яңалыклардан шуны әйтеп үтим. Төп биналардан читтәрәк, 15 минутлап җәяү барсаң, яңа корылмаларны күреп була. Матур итеп капка манаралары салганнар, эчкә үтсәң – аерым бер шәһәрчек. Бу комплекста мәчет төзелеп ята (кыяфәте белән Кол Шәрифне хәтерләтә). Монда һөнәрчеләр йорты, авыл өе, җил тегермәне бар. Ахрысы, нәчәлникләр килүгә ашыгып өлгерткәннәр дип беләм боларны.
Һөнәрчеләр йорты дигәне – “рәссам”, “сынчы”, “икмәк пешерүче”, һ.б. язулы бүлмәләрдән тора. Болар әле буш дисәм – карыйм, рәссам һәм чүлмәк ясаучы чынлап та монда икән! Һөнәрчеләрнең эшләгәнен дә карап торырга мөмкин икән. Рәссам ханым балчыктан ясалган сувенирларга рәсем төшерә, ә чүлмәкче әфәнде балчыктан савыт әвәли.
Җил тегермәне гомумән шаклар каттырды! Мин аны канатын болгап торган муляж гына дип торам, ә ул чын икән. Эченә кереп карасаң, агач детальләрнең әйләнгәне дә, чиләккә тарттырылган онның акканын да күреп була. Татарстанда — бердәнбер мондый тегермән бу. Искиткеч матур!
Кыскасы, саф һава, дуслар-танышлар, мөселман-татар кардәшләр арасында узды ялым. Мин бик шат, ә Болгар истәлеге итеп болында җыйган чәчәкләр һаман да бүлмәмдә хуш ис сибеп утыра…

Бүген иртән радио тыңлыйбыз. Кунакта Вамин директоры. Имеш, кабинетында «Курыксаң, эшләмә, эшләсәң, курыкма» дигән девиз эленеп тора икән. Әти көлә: «Моның девизы бит «Курыксаң, урлама, урласаң, курыкма» дигән, ди. Урыслар шул директорга төртеп, әнә, татарлар нинди карак дип көләләр, аның караклыгы турында легендалар йөри, ди.

Мисырдан килгән яңалык шаккаттырды мине бүген:

Каһирәдәге чуалышта намаз укыган мөселманнарны  христианнар полициядән үз гәүдәләре белән каплап  саклаганнар. Кулга кул тотынышып, христианнар Мисыр мөселманнарын намаз вкытында  полиция һөҗүменнән араларга тырышканнар. Әлеге «тере бронежилет» фотографиясе бөтен дөньяны гаҗәпләндерде.  Ә бит  копт  чиркәве янындагы теракттан соң Мисырдагы динара мөнәсәбәтләр шактый кискенләшкән иде. Инде башка шундый уй килә:  бер берсенә каршы көрәшкән копт-христианнар һәм мөселманнар да Хөсни Мөбәрәккә каршы берләшкәннәр икән, димәк, чынлап та Мисырдагы хәлләр мөшкел булган.  Ә бездәге халык шулай мәйданга чыга алыр иде микән? Тәһрир мәйданы Кызыл мәйданда кабатлана алыр идеме? Бу уйларым белән хезмәттәшләрем белән бүлешкән идем, алар кул гына селтәделәр: бездә алай булса,  протест ясаганнарны атып бетерер иделәр, бетте-китте, вәссәлам, дип. Әллә без түземрәк, әллә Рәсәйдә тормыш Мисырныкыннан яхшырак, белмим. Бер яктан караганда, Мисырда хәерчелек, кешеләр хәтта зиратларда яшәргә мәҗбүр, үз өйләре булмаганга, диләр. Икенче яктан, Мисырга туристлар, димәк, акча агыла, климат җылы, безнең сыман коммуналкага акча түгәсе юк.  Өстәвенә, «хәерче» Мисыр «стабиль» Рәсәйгә һәм Украинага хәтта бәрәңге (!!!) сата. Кем мескен дә, кем  өстендер бу очракта?